شغلني شكرا

في كتير مننا بيبقى عاوز يخلص جامعته علشان بعدها يجري يقدم ورقه فاي مكان علشان يبدأ حياته العملية جنب كورس هياخده خدمة عامة هتعملها أو جيش هيخلصه المهم انك تبدأ تحط رجلك على أول سلمة فحياتك علشان تبين لأهلك واصحابك أو للدايرة اللي انت فيها انك مبقتش المرفه اللي بياخد فلوس من أهله أو الولد العاق اللي شايف ظروف أهله وبرده معتمد عليهم المهم الوقت دا بيبقى عندك طاقة كبيرة نفسك توظفها حتى لو هتروح تقدم فقرة شقلباظ فسيرك المهم يكون ليك كرير خاص بيك؛ المهم تبدأ مشوار البحث عن العمل المناسب تبدأ فتصوير كل شهادة اخدتها من كي جي1 لحد الجامعة المهم cv بتاعك يبقي مملوء بالإنجازات اللي تأهلك تكون مدير فرع فاي شركة، وتروح تحط ورقك فكل الأماكن اللي حواليك وكل الأماكن دي عندهم جملة واحدة وهي "سيب رقم حضرتك هنكلمك بعدين"، وانت ماشاء الله عليك مصدق الكلام دا المهم تروح مفعم بالحيوية وأول ماتوصل تقولهم بالبيت انا محدش يكلمني انا خلاص هشتغل وتعظم فنفسك أوي وتوصل بخيالك لجزيرة المالديف مثلا وانت راجع من هناك هيبقي عدي على تقديمك فالشركات الكتير دي سنة مثلا أن مكانش ضاع اكتر المهم فالوقت دا هتكون زهقت واشتغلت اي شغلانة تانية وكل أملك وحلمك فيها هترَوَّح امتي مفيش عندك اي دافع لإنجاز حاجة فيها غير انك تخلص علشان تنام أو تلعب ببج أو تقعد مع أصحاب دفعتك عالقهوة اللي تحت البيت، وفي يوم تشوف إعلان عالفيس بوك اي الإعلان دا🤔 وظيفة في شركة نفخ عجل العربيات بمرتب شهري ثابت  تمن آلاف جنيه مع وجبتين فاليوم وسكن للتسجيل في الابليكيشن ما قدامك اهو يابني انجز علشان انت المنتظر اصلا وتبدأ فالاتصال بالرقم المكتوب فالإعلان عامة معظم الشركات دي بنت بترد عليك وتقولك اتفضل يافندم حضرتك منين فتقولها من محافظة....... اه طب حضرتك بعيد اوي واحنا ميعادنا تمانية الصبح طب حضرتك انتوا كاتبين في إقامة على حسابكوا فالبنت ترد: لا يافندم تقصد الإقامة على حسابكوا انتو اللي بتقدموا فالشغل.. طب حضرتك المرتب فعلا تمن آلاف جنيه ترد البنت بكل فخر كدا لا حضرتك انت بتبدي معانا بالف ونص إن اخدتهم يعني ولما بتعمل تارجيت مرتفع في نفخ الكاويتش بتزيد معانا إن شاء الله فانت ترد اه نفخ تمام هكلمكوا تاني أتفق بقي النفخ على كام إن شاء الله سلام، وهكذا وهكذا لحد ماتبقى شغلتك فالحياة بتدور على شغل أو محور حياتك كله متوقف على شغلانة بمعنى أوضح اسمك آخره شغلني شكراً. 🤫🧐

ReeNnOo_Helal#